ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ (IHT) ᓯᕗᓕᖅᑐᑦ ᐸᕐᓇᑕᐅᓂᖓᓂᒃ ᓄᓇᕗᒻᒥ ᐃᓄᐃᑦ ᑕᑯᔭᒐᖃᕐᕕᖓ (NIHC) ᐃᑲᔪᖅᑕᐅᓪᓗᑎᒃ ᓄᓇᕗᑦ ᑐᙵᕕᒃ ᑎᒥᖓᓂᒃ (ᑐᙵᕕᒃ), ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ), ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ (KitIA), ᐊᒻᒪᓗ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᓂᒃ (KivIA).
ᐊᖏᓂᓕᒃ 5,500m2 −ᓃᑦᑐᓂᒃ ᓴᓇᔭᐅᓂᐊᖅᑐᖅ ᐃᖃᓗᓐᓂ ᑎᓕᔭᐅᓯᒪᔾᔪᑎᖃᖅᑐᓂ ᓯᕗᒧᐊᒃᑎᑦᑎᓂᕐᒥᒃ ᐱᕙᓪᓕᐊᑎᑦᓯᓂᕐᒥᒃ ᑲᓲᒪᔾᔪᑎᓂᒃ ᐱᖅᑯᓯᓕᕆᕝᕕᖕᓂᒃ/ᐃᓕᖅᑯᓯᓕᕆᕝᕕᖕᓂᒃ ᐊᑐᓂᑦ ᐊᕕᑦᑐᖅᓯᒪᓂᕐᓂ ᐊᒻᒪᓗ ᐋᖅᑭᑦᓯᒪᓂᖃᕐᓗᓂ ᓄᓇᕗᓕᒫᒥ ᑕᑯᑦᓴᐅᑎᑦᓯᖃᑎᒌᖃᑦᑕᕐᓗᑎᒃ ᐱᓕᕆᐊᒃᓴᓂᓪᓗ. NIHC ᐱᙳᖅᑎᑕᐅᓯᒪᔪᑦ ᑕᑯᔭᒐᖃᕐᕕᓕᕆᓂᕐᒥᒃ ᑐᕌᒐᖃᕐᓂᐊᖅᑐᖅ ᐆᒪᔪᒥᒃ ᐱᖅᑯᓯᓕᕆᕝᕕᖃᕐᓂᕐᒥᒃ, ᑲᔪᓯᑎᑦᓯᒍᑎᒥᒃ ᐃᓄᐃᑦ ᐃᓕᖅᑯᓯᖓᓂᒃ ᐅᖃᐅᓯᖓᓂᓪᓗ, ᐊᒻᒪᓗ ᓴᐳᔾᔨᓯᒪᓂᕐᒥᒃ ᓴᖅᑭᔮᖅᑎᑦᓯᓂᕐᒥᓪᓗ ᐃᓕᖅᑯᓯᒃᑯᑦ ᓇᖕᒥᓂᖁᑕᐅᔪᓂᒃ. NIHC ᐃᑲᔫᑎᖃᕐᓂᐊᖅᑐᖅ ᓴᐃᒻᒪᖃᑎᒌᓐᓂᒧᑦ ᒪᒥᓴᕐᓂᒧᓪᓗ ᑲᓱᖅᑎᑦᓯᓂᒃᑯᑦ ᑭᖑᕚᕇᓂᒃ, ᐃᓄᐃᑦ ᑲᓱᒫᒍᑎᒃᓴᖏᓐᓂᒃ ᐃᓐᓇᖁᑎᒥᓄᑦ ᓯᕗᓕᕆᓚᐅᖅᑕᖏᓐᓄᓪᓗ ᐊᒻᒪᓗ ᐃᓄᓐᓃᖔᖏᑦᑐᑦ ᐃᓚᐅᓗᑎᒃ ᐱᖁᑎᑐᖃᖅᑎᒍᑦ ᐅᓂᒃᑳᑎᒍᓪᓗ. ᐃᓕᖅᑯᓯᕐᒥᓐᓂᒃ ᐊᑐᕈᓐᓃᖅᑎᑕᐅᒐᓱᐊᖅᓯᒪᓂᖏᑦ − ᐊᐅᓚᓂᕆᓚᐅᖅᑕᖓ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᑦ, ᐊᕝᕗᑎᑎᑕᐅᖃᑦᑕᓚᐅᕐᓂᖏᑦ ᐃᓚᒌᑦ ᓄᒃᑎᖅᑕᐅᖃᑦᑕᓂᒃᑯᑦ ᓄᓇᓕᖕᓄᑦ, ᐳᕙᓪᓗᓐᓂᖅ ᐋᓐᓂᐊᕐᕕᓕᐊᖃᑦᑕᕈᑕᐅᓯᒪᓂᖓ ᐊᒻᒪᓗ 1960−ᖏᓐᓂ ᑎᒍᓚᔭᐅᓂᒥᓂᖏᑦ ᐱᐊᕋᐃᑦ − ᐊᒻᒪᓗ ᒥᑭᓪᓕᑎᖅᑕᐅᒪᓂᖏᑦ ᐃᓄᐃᑦ ᐃᓕᖅᑯᓯᖓ, ᐱᖕᒪᕆᐅᔪᖁᑎᖏᑦ ᐊᒻᒪᓗ ᐱᖅᑯᓯᖏᑦ ᐅᓪᓗᒥ ᑕᐃᒎᓯᖃᓕᖅᑐᒥ ᓄᓇᕗᑦ ᐅᓄᖅᑐᓄᑦ ᐃᓄᓐᓄᑦ ᑲᓱᒃᑲᓐᓂᕈᒪᒍᑕᐅᓯᒪᓕᖅᑐᖅ ᐃᓅᓯᕆᖃᑦᑕᓚᐅᖅᑕᒥᓄᑦ ᓴᕐᖓᑎᑦᓯᑲᓐᓂᕈᑎᒃᓴᒥᓂᒃ ᓇᑭᙶᖅᓯᒪᓂᕐᒥᓂᒃ ᐃᓕᖅᑯᓯᕐᒥᓂᓪᓗ. NIHC ᐃᑲᔪᕐᓂᐊᖅᑐᖅ ᐃᓄᓐᓂᒃ ᖃᐅᔨᓇᓱᐊᕐᓗᑎᒃ ᐱᖕᒪᕆᐅᔪᓂᒃ ᑕᑯᓐᓇᒐᕐᒥᓂᒃ ᐋᔩᕋᕈᑎᖃᒃᑲᓂᕐᓗᑎᓪᓗ ᓇᖕᒥᓂᖅ ᐊᒻᒪᓗ ᐊᑕᖏᕐᓗᑎᒃ ᐃᓕᖅᑯᓯᕐᒥᓂᒃ ᑐᑭᓯᒍᑎᒃᓴᒥᓂᒃ.
ᓄᓇᕗᑦ ᐃᓄᐃᑦ ᐱᖅᑯᓯᓕᕆᓂᕐᒧᑦ ᑲᓲᒪᔾᔪᑎᖓ ᐃᓪᓗᓂ ᐃᖃᓗᓐᓂ ᓄᓇᕗᓕᒫᒥᓗ ᓄᓇᕗᒻᒥ ᐃᓄᓐᓄᑦ ᐅᓪᓗᒥ ᖃᐅᑉᐸᒧᓪᓗ ᐊᑐᖃᑦᑕᕈᓐᓇᑎᑦᓯᓂᐊᖅᑐᖅ ᐃᓕᖅᑯᓯᑦᑎᓐᓂᒃ ᐊᒻᒪᓗ ᖃᐅᔨᒃᑲᐃᒍᑎᒋᓗᒍ ᓄᓇᕐᔪᐊᓕᒫᒧᑦ.
ᓄᓇᕗᒻᒥ ᐃᓄᐃᑦ ᑕᑯᔭᒐᖃᕐᕕᖓ ᓴᖅᑮᓯᒪᕗᖅ ᐱᖅᑯᓯᒃᑯᑦ ᖃᐅᔨᒪᓂᐅᔪᓂᒃ ᐊᒻᒪᓗ ᐊᑐᐃᓐᓇᐅᑎᑦᓯᓪᓗᓂ ᓴᖅᑭᔮᖅᑐᓂᒃ ᐊᒻᒪᓗ ᓴᖅᑭᔮᙱᑦᑐᓂᒃ ᐱᖅᑯᓯᕐᓂᒃ ᓄᓇᕗᓕᒫᒥ ᐅᔾᔨᕆᔭᐅᒃᑲᓐᓂᕈᑎᒃᓴᖏᓐᓂᒃ ᐃᓄᐃᑦ ᐃᓕᖅᑯᓯᖓᓂᒃ ᐊᒻᒪᓗ ᐃᓕᖅᑯᓯᒃᑯᑦ ᒪᒥᓴᕈᑎᒃᓴᓂᒃ ᓴᐃᒻᒪᖃᑎᒌᒍᑎᒃᓴᖏᓐᓂᓗ ᐃᓄᐃᑦ ᐃᓅᙱᑐᓪᓗ.
ᓄᓇᕗᒻᒥ ᐃᓄᐃᑦ ᑕᑯᔭᒐᖃᕐᕕᖓ ᑎᒍᓯᓯᒪᕗᖅ, ᔭᒐᔾᔭᐃᖅᓯᓯᒪᓂᕐᒥᒃ ᖃᐅᔨᓴᕐᓂᒥᓪᓗ ᐱᖁᑎᑐᖃᕐᓂᒃ, ᓴᓇᐅᒐᕐᓂᒃ ᐊᒻᒪᓗ ᖃᐅᔨᓴᕋᑦᓴᓂᒃ ᐊᑦᑐᐊᔪᓂᒃ ᐃᓄᐃᑦ ᐃᓕᖅᑯᓯᖓᓄᑦ ᐊᒻᒪᓗ ᐃᖅᑲᓇᐃᔭᖃᑎᖃᖅᑐᑎᒃ ᓄᓇᓕᓐᓂ ᑲᑐᔾᔨᖃᑎᒋᔭᒥᓂᒃ, ᑲᓇᑕᒥ ᐊᒻᒪᓗ ᓄᓇᕐᔪᐊᒥ ᑕᑯᔭᒐᖃᕐᕕᖕᓂᒃ ᐃᓕᓐᓂᐊᕕᔾᔪᐊᓂᓪᓗ ᐋᖅᑭᓱᐃᓪᓗᑎᒃ ᑕᑯᑦᓴᒃᑯᑦ ᖃᕆᓴᐅᔭᒃᑯᓪᓗ ᓴᖅᑭᔮᖅᑎᑕᐅᔪᓂᒃ, ᐃᓕᓐᓂᐊᕈᑎᒃᓴᓕᐊᖑᓯᒪᔪᑎᒍᑦ ᐃᓕᓴᐃᒍᑎᒃᓴᓂᒃ, ᐊᒻᒪᓗ ᐃᓅᓯᓕᒫᒥ ᐃᓕᑉᐸᓪᓕᐊᒍᑎᒃᓴᓂᒃ, ᐊᒻᒪᓗ ᐊᔪᕈᓐᓃᖅᓴᐅᑎᒃᓴᓂᒃ ᐊᒻᒪᓗ ᐱᓕᖕᒪᒃᓴᐅᑎᒃᓴᓂᒃ ᓄᓇᕗᒻᒥᐅᓄᑦ ᐊᕕᑦᑐᖅᓯᒪᓂᓕᒫᖏᓐᓂ.