ᒪᓂᒪᑎᑦᓯᓛᕐᓂᐊᖅᑐᒍᑦ ᐊᕙᖕᒧᓕᖓᔪᓂᒃ ᐊᔾᔨᒌᖏᑦᑐᓂᒃ ᐃᓕᓐᓂᐊᕋᑦᓴᓂᒃ ᓄᓇᓖᑦ ᐃᓄᖏᓐᓄᑦ ᑲᑎᖃᑦᑕᕐᓗᑎᒃ. ᐊᔪᕐᓇᖏᑉᐸᑦ ᐃᖅᑲᓇᐃᔭᖃᑎᖃᖃᑦᑕᓂᐊᖅᑐᒍᑦ ᓄᓇᓕᓐᓂ ᑲᑐᔾᔨᖃᑎᒌᓂᒃ ᐃᓕᓐᓂᐊᕋᑦᓴᓕᐅᕐᓗᑕ ᐊᕐᕌᒍᓄᑦ ᑎᑭᐅᑎᓯᒪᔪᓄᑦ ᒪᑐᐃᖅᑕᐅᓂᖓᓄᑦ ᐅᓪᓗᖅ ᐊᒻᒪᓗ ᐃᓕᓐᓂᐊᕋᑦᓴᑦ ᐋᖅᑭᓱᖅᓯᒪᖁᓪᓗᒋᑦ ᐱᔭᕆᐊᓕᖏᓐᓂᒃ ᐃᓱᒪᒥᒍᑦ. ᓲᕐᓗ ᐊᔾᔨᐅᑎᓪᓗᒍ:
ᖃᔭᒃᑯᑦ ᓴᓴᐃᔭᑎ
ᖃᔭᒃᑯᑦ ᓴᓴᐃᔭᑎ ᓴᖅᑭᖅᑕᐅᓚᐅᖅᑐᑦ 2016-ᒥ ᐅᑎᖅᑎᑦᓯᖁᓪᓗᒋᑦ ᖃᔭᓕᐅᕈᓯᕐᓂᒃ ᐊᒻᒪᓗ ᐸᐅᖃᑦᑕᓂᕐᒥᒃ ᒪᖃᐃᖃᑦᑕᓂᕐᒥᓪᓗ ᖃᔭᒃᑯᑦ. IHT−ᑯᑦ ᐃᑲᔪᖅᓯᒪᔭᖏᑦ ᖃᔭᒃᑯᑦ ᐱᙳᖅᑎᑕᐅᓚᐅᖅᓯᒪᒻᒪᑕᓂᒃ. ᓴᓴᐃᔭᑎ ᐱᓕᕆᖃᑎᖃᕆᐊᙵᓚᐅᖅᑐᖅ ᐃᓐᓇᕐᒥᒃ ᑭᒻᒥᕈᒻᒥᐅᒥᒃ ᐅᑎᖅᑎᑕᐅᖁᓪᓗᒍ ᕿᑭᖅᑖᓗᒻᒥ ᖃᔭᓕᐅᕈᓯᖅ. ᐱᓕᕆᖃᑎᖃᖃᑦᑕᖅᓯᒪᔪᑦ ᓄᓇᓕᓐᓂ ᒪᒃᑯᑦᑐᓂᒃ ᐃᑲᔪᖅᑎᒋᓪᓗᒋᑦ ᖃᔭᓕᐅᖅᑎᓪᓗᒋᑦ, ᐊᒻᒪᓗ 2022-ᒥ, ᐃᑲᔪᖅᑕᐅᓪᓗᑎᒃ ᕿᑭᖅᑕᓂᒃᑯᓐᓂᒃ ᐊᒻᒪᓗ ᒐᕙᒪᑐᖃᒃᑯᓐᓂᒃ, ᑲᑎᑎᑦᓯᓚᐅᖅᑐᑦ ᑕᓪᓕᒪᓂᒃ ᕿᑭᖅᑖᓗᒻᒥ ᓄᓇᓕᖕᓂᒃ ᖃᔭᓕᐅᕈᓯᕐᒥᓂᒃ ᖃᔭᓕᐅᖁᓪᓗᒋᑦ ᐅᑎᕈᑎᓂᐊᖅᑕᒥᓂᒃ ᓄᓇᒥᓐᓄᑦ ᖁᕕᐊᓲᑎᖃᕐᓗᑎᒃ ᑕᓪᓗᕈᑎᐅᑉ ᐃᒪᖓᓂ ᐊᖏᖃᑎᒌᒍᑎᓂᒃ.
ᓴᓴᐃᔭᑎᒃᑯᑦ ᑐᖅᑯᐃᕕᓖᑦ ᓱᓇᒃᑯᑖᖃᐅᒻᒥᒃ ᐅᓕᓐᓂᐅᑉ ᖃᓂᒋᔮᓂ ᑐᓄᐊᓂ ᐃᓐᓇᐃᑦ ᖃᕐᒪᖓᑕ ᐊᒻᒪᓗ ᐱᓕᕆᐊᖃᓕᖅᑐᑦ IHT−ᑯᑎᒍᑦ ᐃᓕᓐᓂᐊᕈᑎᒃᓴᖏᓐᓂᒃ. ᖃᔭᒃᑯᑦ ᑲᑎᒪᔨᐅᖃᑕᐅᔪᖅ ᐊᒻᒪᓗ ᐃᓕᓴᐃᔨ ᐋᓯᕙᒃ ᐊᕐᓇᖅᑯᖅ−ᕗᕆᐅᓪ ᓂᕆᐅᒋᔭᓕᒃ ᐊᑐᐃᓐᓇᖃᕐᓂᐊᓂᕐᒥᒃ ᐊᑕᖏᖅᑐᒥᒃ ᐊᑐᕋᑦᓴᖅᑕᓕᒻᒥᒃ ᐃᓕᓐᓂᐊᑎᑦᓯᓂᕐᒥᒃ NIHC-ᒥ ᖃᔭᓕᐅᕐᓂᕐᒧᑦ ᐊᒻᒪᓗ ᐊᓯᖏᓐᓂᒃ ᐃᓄᐃᑦ ᓴᓇᕐᕈᑎᖏᓐᓂᒃ ᐱᖁᑎᖏᓐᓂᓪᓗ.
“ᐊᓯᔾᔨᕐᓂᐅᔪᖅ ᐱᖅᑯᓯᑐᖃᖓᓂᒃ ᐃᓄᐃᑦ ᐅᓪᓗᒥᓯᐅᑎᓄᑦ, ᕿᖃᑐᐃᓐᓇᕐᓂᖅ ᐃᓅᓯᕆᔭᐅᓚᐅᙱᑦᑐᖅ ‘ᖃᓄᐃᓕᐅᕈᓯᕐᓂ’ ᐱᕙᓪᓕᐊᒍᑎᒃᓴᑎᓐᓂᒃ. ᐊᑐᖅᑕᐅᑎᑕᐅᓚᐅᖅᑐᖅ ᐊᖓᔪᖅᑳᑎᓐᓄᑦ ᐊᑖᑕᑦᓯᐊᒃᑯᑎᓐᓄᓪᓗ ᐋᓇᒃᑯᑎᓐᓄᑦ/ᐊᓈᓇᑦᓯᐊᒃᑯᑎᓐᓄᑦ. ᐊᓯᔾᔨᑲᓪᓚᓐᓂᖅ ᐊᒥᓱᓄᑦ ᐃᓄᓐᓄᑦ ᓱᒃᑯᒍᑕᐅᓯᒪᔪᒻᒪᕆᒃ ᑎᒥᐅᔪᓄᑦ ᓲᖑᓂᖅᓴᐅᓯᒪᓂᖏᓐᓄᑦ. ᑕᑯᓐᓇᑕᒃᑯᑦ, ᓴᖅᑭᖅᑕᐅᓂᖓ ᐃᓄᐃᑦ−ᓇᖕᒥᓂᖁᑎᖓ−ᐊᐅᓚᑕᖓᓗ ᑕᑯᔭᒐᖃᕐᕕᒃ, ᐊᒻᒪᓗ ᓴᓇᔭᐅᓂᖏᑦ ᐃᓪᓗᐃᑦ ᐊᑐᕋᑦᓴᑦ ᓇᖕᒥᓂᖅ ᓄᓇᓕᑦᑎᒍᑦ, ᐋᖅᑭᒋᐊᕈᑕᐅᔪᖅ ᐊᖅᑯᑕᐅᒋᐊᓕᖕᓂᒃ ᒪᑭᑉᐸᓪᓕᐊᓂᕐᒧᑦ.
ᐃᓕᓐᓂᐊᓂᕐᒧᑦ ᐃᓂᒃᓴᖃᕆᐊᖃᕐᓂᖅ ᐃᑉᐱᓐᓂᕈᑕᐅᓯᒪᔪᖅ ᐅᓄᖅᑐᓄᑦ ᑲᑐᔾᔨᖃᑎᒌᓄᑦ ᐊᒻᒪᓗ ᐊᒥᓱᕐᔪᐊᓄᑦ ᑭᒃᑯᑐᐃᓐᓇᕐᓄᑦ ᐃᖃᓗᓐᓂ.ᖃᔭᒃᑯᑦ ᐃᑲᔪᖅᑕᐅᒍᓐᓇᙳᐊᑕᖅᓯᓐᓇᕈᓐᓇᖅᓯᒪᔪᑦ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᓂᒃ ᐱᕈᖅᐸᓪᓕᐊᓂᑦᑎᓐᓄᑦ ᑮᓇᐅᔭᓕᐅᕋᓱᐊᖅᑎᐅᑎᓐᓇᑕ. ᑭᓯᐊᓂ ᐊᒥᓲᒻᒥᔪᑦ ᐃᓄᐃᑦ ᐱᔪᓐᓇᖅᓯᒪᙱᑦᑐᑦ. ᑖᓐᓇ ᑕᑯᔭᒐᖃᕐᕕᒃ ᐊᒻᒪᓗ ᐃᓂᒃᓴᖓ ᐊᑐᐃᓐᓇᕈᖅᑕᐅᓂᐊᖅᑐᖅ ᓄᓇᓖᑦ ᐃᓄᖏᓐᓄᑦ ᐃᑲᔫᑎᒃᓴᐅᓗᓂ ᐃᑳᕈᑕᐅᓗᓂ ᑖᑦᓱᒧᖓ ᐊᐳᖅᓯᒪᕕᖕᒧᑦ ᐊᑐᐃᓐᓇᖃᕈᑎᒃᓴᒥᒃ ᐊᑦᑕᓇᙱᑦᑐᒥᒃ ᐊᒻᒪᓗ ᓈᖕᒪᑦᑐᒥᒃ ᐃᖅᑲᓇᐃᔭᕐᕕᒃᓴᖃᖁᓪᓗᒋᑦ.” – ᐋᓯᕙᒃ ᐊᕐᓇᖅᑯᖅ−ᕗᕆᐅᓪ Aasivak Arnaquq-Baril
ᑐᑭᓯᒋᐊᒃᑲᓂᕐᕕᒃᓴᖅ ᐃᓕᓐᓂᐊᕈᑕᐅᖃᑦᑕᓂᐊᖅᑐᓂᒃ ᒪᓂᒪᑕᖏᓐᓂᒃ ᖃᔭᒃᑯᑦ ᓴᓴᐃᔭᑎ, ᖃᐅᔨᒋᐊᕐᕕᒋᓗᒍ: aasivak@ihti.ca
