IHT ᑲᓐᑐᓛᒃᓯᓯᒪᔪᑦ Origin Studios−ᑯᓐᓂᒃ, ᐊᓪᓚᕝᕕᓕᓐᓂᒃ ᐋᑐᕚᒥ, ᒪᓐᑐᕆᐊ, ᐊᒻᒪᓗ ᑐᕌᓐᑐᒥᒃ ᐋᖅᑭᑦᓱᐃᓪᓗᑎᒃ ᑐᑭᓕᐅᕆᓂᕐᒧᑦ ᐸᕐᓇᐅᑎᓂᒃ NIHC−ᒧᑦ. ᑐᑭᓕᐅᕆᓂᕐᒧᑦ ᐸᕐᓇᓐᓂᖅ ᑕᑯᔭᒐᖃᕐᕕᒻᒥ ᐋᖅᑭᑦᓯᒪᓂᖓᓂᒃ ᐊᐅᓚᑕᐅᓂᖓ ᓇᓗᓇᐃᕈᑕᐅᓪᓗᓂ ᐊᑦᑐᐊᓂᖃᕐᓂᖅᐹᓂᒃ ᐊᒻᒪᓗ ᐊᑦᑐᐃᓂᖃᕐᓂᖅᐸᖑᒍᓐᓇᖅᑐᓂᒃ ᐅᖃᖃᑎᒌᒍᑕᐅᔪᒧᑦ ᐃᓗᓕᖏᓐᓄᑦ ᐊᒻᒪᓗ ᐅᓂᒃᑳᓂᒃ ᓯᓚᑐᔪᒥᒃ ᐃᑉᐱᓇᖅᑐᒥᓪᓗ ᑲᓲᒪᑎᑦᓯᒍᑕᐅᒍᓐᓇᖅᑐᓂᒃ ᐳᓚᕋᑎᓄᑦ ᐊᒻᒪᓗ ᐱᖁᑎᑐᖃᕐᓄᑦ ᓴᖅᑭᔮᖅᑎᑕᐅᔪᓄᑦ. ᐊᐅᓚᓂᕆᔭᐅᔭᕆᐊᓕᒃ ᓴᖅᑮᒍᑎᒃᓴᒥᒃ ᐊᑐᖅᑕᐅᓯᒪᔪᓃᙶᖅᑐᓂᒃ ᐊᒻᒪᓗ ᐃᓚᐅᑎᑕᐅᓗᑎᒃ ᑎᑎᕋᖅᓯᒪᔪᑦ, ᖃᐅᔨᓴᖅᑕᐅᓯᒪᔪᑦ, ᖃᕆᓴᐅᔭᒨᖅᑲᖅᑕᐅᓯᒪᔪᑦ, ᑐᑭᓯᑎᑦᓯᒋᐊᕈᑎᓕᐊᖑᓯᒪᔪᑦ, ᐊᒻᒪᓗ ᑕᑯᑦᓴᒃᑯᑦ ᑭᒡᒐᖅᑑᑕᐅᓗᑎᒃ ᑐᓴᐅᒪᑎᑦᓯᒍᑎᒃᓴᓂᒃ.
ᓇᓕᖅᑯᑕᐅᓗᓂ ᑐᑭᓕᐅᕐᓂᕐᒧᑦ ᐸᕐᓇᐅᑎ ᐃᓕᑉᐸᓪᓕᐊᒍᑎᒃᓴᐅᔪᖅ ᐊᔾᔨᒋᙱᑐᖅᑎᒍᑦ ᐱᔾᔪᓯᐅᔪᓂᒃ ᐊᒻᒪᓗ ᐃᑲᔫᑎᓕᒃ ᖃᐅᔨᒋᐊᖅᑕᒥᓂᒃ ᐳᓚᕋᑏᑦ ᐊᑐᖅᓯᒪᖁᓪᓗᒋᑦ. ᐳᓚᕋᑏᑦ ᐊᐅᓪᓚᕈᑎᒃ ᑐᑭᓯᒪᑦᓯᐊᕐᓗᑎᒃ ‘ᐊᖏᔪᒥᒃ ᐃᓱᒪᒋᔭᖃᕐᓗᑎᒃ’; ᐊᒻᒪᓗ ᑎᒍᓯᓯᒪᓗᑎᒃ ᐃᓚᖓᒍᑦ ‘ᓂᕆᐅᒋᓚᐅᖅᑕᒥᓂᒃ ᑐᑭᓯᒍᒪᓯᒪᔭᒥᒍᑦ’ ᑕᕝᕙᙶᕐᓗᑎᒃ ᖁᕕᐊᒋᓚᐅᖅᑕᒥᓂᒃ, ᖁᕕᐊᓇᖅᑐᒦᑦᓱᑎᒃ, ᐃᖅᑲᓇᖅᑐᒥᒃ, ᐊᒻᒪᓗ ᐅᐸᒍᒥᓇᓗᖅᑯᑕᐅᔪᒥᒃ ᑎᒍᓯᕕᒋᓚᐅᖅᑕᒥᓂᒃ.
NIHC ᑐᑭᓕᐅᕆᓂᕐᒧᑦ ᐸᕐᓇᐅᑎᓂ ᓇᓗᓇᐃᖅᓯᒪᓂᐊᖅᑐᖅ ᐃᓘᓐᓈᒍᑦ ᑲᒪᒋᔭᐅᔪᒃᓴᖅ ᓴᖅᑭᔮᖅᑎᑕᐅᔪᓄᑦ ᐸᕐᓇᐅᑦ ᑐᕌᖓᓂᓕᓐᓂᒃ ᓇᓗᓇᐃᖅᑕᐅᓯᒪᔪᓂᒃ ᐅᓂᒃᑳᓂᓪᓗ ᐊᑯᓂᐅᔪᒧᑦ ᓴᖅᑭᔮᖅᑎᑕᒃᓴᓄᑦ ᑕᑯᔭᒐᖃᕐᕕᖕᒥ, ᒪᓂᒪᑎᑦᓯᓗᑎᒃ ᐊᑐᓕᖁᔨᔾᔪᑎᓂᒃ ᓴᖅᑭᔮᖅᑎᑕᐅᓚᐅᐱᓪᓚᓂᐊᖅᑐᓂᒃ ᐃᖏᕐᕋᔭᕋᑦᑐᓂᓪᓗ ᓴᖅᑭᔮᖅᑎᑕᐅᔪᓂᒃ, ᐳᓚᕋᑎᑦ ᖃᐅᔨᓇᓱᐊᕈᓐᓇᕐᓗᑎᒃ IQ ᖃᐅᔨᓴᕐᕕᖕᒥᒃ, ᑲᑎᙵᓗᑎᒃ ᐊᒻᒪᓗ ᑲᒪᒋᔭᖃᕐᓗᑎᒃ ᐊᑦᑐᐊᓗᒋᑦ ᐊᐅᓚᓂᐅᔪᓂᒃ ᓄᑕᖅᑲᑦ ᑐᑭᓯᓂᐊᕐᕕᖓᓂ, ᐊᒻᒪᓗ ᐃᓚᓕᐅᔾᔨᓯᒪᖃᑦᑕᓂᒃᑯᑦ ᑲᒪᒋᔭᐅᓗᓂ ᓇᑦᑎᓐᓇᖅ ᑕᑯᑦᓴᐅᑎᑕᐅᔪᖅ. ᑐᑭᓕᐅᕈᑎᑦ ᐃᑲᔫᑎᖃᕐᓂᐊᖅᑐᑦ ᐊᐅᓚᓂᐅᔪᓄᑦ ᐃᓯᖅᐸᓪᓕᐊᕕᖓᓂ, ᓴᓐᓇᕕᓐᓂ, ᐊᒻᒪᓗ ᓯᓚᒥ ᓱᐃᓛᕿᓂᐅᔪᓂ.
ᑐᑭᓕᕆᓂᕐᒧᑦ ᐸᕐᓇᑎᑦ ᐱᓇᓱᐊᕐᓂᐊᖅᑐᑦ ᐳᓚᕋᑎᓂᒃ ᐊᔭᐅᖅᑑᑎᒃᓴᓂᒃ, ᐃᖅᑲᓇᐃᔮᖃᕐᓗᑎᒃ ᐃᓕᕋᓇᙱᓪᓗᑎᒃ ᐊᒻᒪᓗ ᐊᑐᐃᓐᓇᐅᑎᑦᓯᓗᑎᒃ ᐊᔾᔨᒌᙱᑦᑐᓂᒃ ᑭᒃᑯᑐᐃᓐᓇᕐᓅᖓᔪᓂᒃ ᐊᒻᒪᓗ ᑐᑭᓯᕙᓪᓕᐊᒍᓯᖏᓐᓄᑦ ᓈᖕᒪᓪᓗᑎᒃ. ᑭᒡᓕᖃᙱᑦᑐᑦ ᐱᔾᔪᑎᒃᓴᑦ ᖃᐅᔨᒋᐊᖅᑐᓄᑦ ᐃᑲᔪᑎᒃᓴᓂᒃ ᑐᑭᓕᐅᕆᓂᕐᒧᑦ NIHC−ᒥ ᐊᒻᒪᓗ ᐱᓇᓱᐊᒻᒪᕆᑦᑕᕗᑦ ᐱᖅᑯᓯᕐᒨᖓᙱᑦᑐᓂᒃ ᐃᓂᒃᓴᖃᖅᑎᑦᓯᓂᕐᒥᒃ, ᓲᕐᓗ ᑳᐱᕐᕕᒃ, ᐊᓇᕐᕖᑦ, ᐊᒻᒪᓗ ᑐᓄᐊ ᐃᓪᓘᑉ, ᐊᑕᖐᒍᑎᒃᓴᓂᒃ ᐳᓚᕋᑎᓄᑦ ᐃᖅᑲᓇᐃᔭᖅᑎᓄᓪᓗ ᐊᔾᔨᐅᙱᑎᑦᓯᖏᓪᓗᑎᒃ.
ᓴᖅᑮᓂᖅ ᐃᑲᔫᑎᓕᒻᒥᒃ ᑐᑭᓕᐅᕆᓂᕐᒧᑦ ᐸᕐᓇᐅᑎᒥᒃ, ᐱᖕᒪᕆᐅᔪᖅ ᓄᓇᓕᓕᒫᓄᑦ ᓄᓇᕗᒻᒥ ᐊᑕᖐᒋᐊᖃᕐᓂᖓ ᐸᕐᓇᑕᐅᓂᖓᓂ NIHC. Origin Studios ᑲᒪᒋᔭᖓ ᓈᓚᒡᓗᑎᒃ ᖃᐅᔨᓂᕐᒥᒍᓪᓗ ᓄᓇᓖᑦ ᐃᓄᖏᓐᓂᒃ ᐃᓚᐅᓗᑎᒃ ᑐᕋᐃᓐᓇᖅᑐᒥᒃ ᓄᓇᓕᓐᓂ ᖃᐅᔨᒋᐊᕐᕕᖃᕐᓂᕐᒥᒃ ᐊᒻᒪᓗ ᑐᓴᕆᐊᕐᕕᖃᕐᓂᕐᒥᒃ ᐊᒻᒪᓗ ᐅᖓᓯᑦᑐᒦᑦᑐᓂᒃ ᑐᑭᓯᒋᐊᕐᕕᖃᕐᓂᕐᒧᑦ ᐱᓕᕆᐊᓂᒃ. ᑲᑎᒪᖃᑎᒋᖃᑦᑕᓂᐊᖅᑕᕗᑦ ᖃᐅᔨᒪᔨᑕᑦ, ᑲᑎᒪᔨᕋᓛᑦ, ᐊᒻᒪᓗ ᑎᒍᒥᐊᖅᑏᑦ ᐊᐅᓚᑕᐅᓂᓕᒫᖓᓂ ᐊᒻᒪᓗ ᑐᑭᒧᐊᒍᑎᒃᓴᓪᓗᐊᑕᓕᕆᔾᔪᑎᓂ ᑐᓂᔭᐅᖃᑦᑕᕐᓗᑎᒃ ᐅᓂᒃᑳᑦ ᓴᖅᑭᓚᐅᖅᑐᓂᒃ. ᓯᕗᓪᓖᑦ ᓂᐱᖏᑦ ᖃᓂᙳᓕᖅᑎᑕᐅᒋᐊᕐᓂᐊᖅᑐᑦ ᑐᑭᓕᐊᖅᑕᐅᖏᖔᕐᓗᑎᒃ ᐊᒻᒪᓗ Origin-ᒥ ᐱᓕᕆᔨᖏᑦ ᑐᑭᒧᐊᒃᑎᑕᐅᓗᑎᒃ ᐃᓄᖕᒧᑦ ᑕᑯᔭᒐᖃᕐᕕᓕᕆᓂᕐᒧᑦ ᖃᐅᔨᒪᔨᑕᕐᒧᑦ ᐊᐅᓚᑕᐅᓂᓕᒫᖓᓂ.
ᓴᖅᑭᔮᖅᑎᑕᐅᔪᓄᑦ ᐱᓕᕆᐊᒃᓴᓄᓪᓗ ᑲᑎᒪᔨᕋᓛᖏᑦ
ᑐᑭᓕᐅᕆᓂᕐᒧᑦ ᐸᕐᓇᓐᓂᖅ ᑖᓐᓇᑑᓪᓗᓂ ᐋᖅᑭᓱᖅᑕᐅᔪᖅ IQ ᑐᙵᕕᖏᑎᒍᑦ. ᐃᓱᓕᒪᓕᐅᕈᑎᑦ ᐋᔩᕋᕈᑕᐅᔪᑎᒍᑦ ᐊᒻᒪᓗ ᐊᖏᖃᑎᒌᓐᓂᒃᑯᑦ; ᐊᒻᒪᓗ ᐃᖅᑲᓇᐃᔭᖃᑎᒌᓐᓂᖅ ᐊᑕᐅᓯᕐᒨᖓᔪᓂᒃ ᐱᔾᔪᑎᖃᕐᓗᓂ